7场英超轮住上 红军曼城冇甩拖

2019/09/14

文:黄兴桂

史达宁

next 1/1 pre

啱啱先打完两轮国际赛,话咁快今晚又有英超,由夜晚7点半去至凌晨共有7场,由食晚饭睇到食消夜,绝对係追月夜最佳节目。

英超两强续胜双胆,当然係讲榜首双雄利物浦同曼城喇,佢哋今晚分战「喜鹊」纽卡素及诺域治,应该实食冇黐牙。红军开季4场联赛全胜,势头强劲,要喺主场捉「鹊」冇难度,唯一嘅隐忧,係上仗穆罕默德沙拿独食失机,嬲到面对空门咁滞嘅沙迪奥文尼扎扎跳,被换出嗰阵发晒脾气,呢个时候就係考考主帅高普点样去协调,但利物浦从未赢过英超冠军,我相信球员亦会大局为重,放下恩怨全力争胜。

热刺扑「水」有支持

曼城虽有中坚拿朴迪重伤长抖,但佢哋一向以攻代守,净係史达宁、奇云迪布尼都弗到漏油,造访实力麻麻、后防不稳嘅诺域治,岂有不胜之理,因此呢两隻胆非常稳阵。至于两脚方面,季初表现飘忽嘅曼联,今晚主场迎战李斯特城,係时候赢波终止颓势,而热刺主场对水晶宫,近5次联赛交手热刺赢晒,呢隻脚冇甩拖,祝大家人月两团圆。

金句:国家队赛后今晚战火重燃,英超两强续胜双胆射两脚。