今晚过后可能冇长胜军

2019/08/24

文:黄兴桂

今季英超只係打咗两轮,但20队中有18队已经失过分,认真紧凑,仅余两支全胜球队正係今晚Late Show主角,利物浦喺主场晏菲路球场迎战阿仙奴,掀起开季后首场「榜首大战」。

论气势,上季联赛亚军兼欧联盟主嘅利物浦确胜一筹,联赛两连胜轰6粒,中间仲捧埋欧超杯,不过首席门神艾利臣比加要继续养伤,而代替佢嘅阿祖安卡斯迪路喺呢3仗场场都有失波,包括上轮对修咸顿嘅「虾碌」,长期有个计时炸弹喺后防,队友少不免担心难以踢得好放。而且「红军」众将征战频仍,如何利用适当嘅轮换,减低疲态同伤患问题非常重要。作客嘅阿仙奴绝非善男信女,久违嘅开季两连赢令佢哋信心十足,今晚过后随时英超再冇长胜之师,因为打和并唔出奇。

红魔成败 全繫普巴

至于早少少开波嘅曼联主场对水晶宫,「红魔鬼」延续「成也普巴、败也普巴」嘅坏习惯,当佢踢得好时,可以狂数车仔4粒;倘若佢当日心浮气躁,成队波随即跌Watt。成季流流长球员难免有起伏,而普巴仲係嗰种睇心情踢波嘅球员,点样协助佢克服心魔,坚係考起主帅苏斯克查。