红裤子少帅斗功架

新季英超啱啱开锣,揭幕战利物浦大胜诺域治四个一皮,赢得清风送爽,美中不足係门神艾利臣比加伤出,但正如我赛前所讲,「红军」争取联赛冠军目标非常清晰,强势开局乃意料之内。

讲番今晚重头戏「红蓝大战」,曼联主场斗车路士,两个红裤子出身嘅冠军高手、如今返回旧东家当主帅嘅苏斯克查同林柏特正面交锋。「红魔」贵价买入右闸云比沙卡及中坚哈利马古尼,其中后者更成为世界最高身价后衞,到底係咪已经达到利物浦铁衞华基尔云迪积克嘅水平?而箭头卢卡古走人后,「苏B」喺锋线只能靠拉舒福特、安东尼马迪尔及阿历斯山齐士,火力係咪足够?

禁买令阴霾考起林伯

另边厢林柏特喺禁买令阴霾下接手车仔,尽显情义,由于夏萨特离队,点样注入进攻新元素将成关键,阵中仍有高华锡及美国快翼基斯甸普列锡可用,要考考「林伯」睇餸食饭能力喇。我认为今仗五五波,车仔可全身而煺。

早少少开波嘅阿仙奴作客纽卡素,前者积极增兵应可刺激塬有球员斗心,就算「喜鹊」地头圣占士公园向来係强队嘅英雄冢,但相信阿仙奴至少可攞番1分。